नामदार गिरीश महाजन विरुद्ध दिलीप खोडपे सर: कोणाच्या पारड्यात जाणार विजय? तालुकावासीयांमध्ये शिगेला पोहोचली उत्सुकता

जळगाव जिल्हा प्रतिनिधी नितीन इंगळे 

जामनेर: विधानसभा निवडणूक 2024 च्या पार्श्वभूमीवर 19-जामनेर मतदारसंघात मंत्री गिरीश महाजन आणि राष्ट्रवादी काँग्रेसचे उमेदवार दिलीप खोडपे यांच्यातील थेट लढतीने तालुक्यात मोठी चुरस निर्माण केली आहे. या दोन दिग्गज नेत्यांमधील लढतीने स्थानिक राजकारण तापले असून, मतदारांसह तालुकावासीयांच्या मनात "कोणाचा विजय होणार?" याची उत्सुकता वाढली आहे.

गिरीश महाजन यांचा अनुभव आणि कामगिरी:

गिरीश महाजन हे जामनेरमधील सातत्याने विजयी राहिलेल्या नेत्यांपैकी एक असून त्यांनी तालुक्यातील पाणी समस्या, रस्ते विकास, आणि सामाजिक प्रकल्पांवर प्रभावी कामगिरी केली आहे. त्यांच्या नेतृत्वाखाली तालुक्याला वाघूर धरणातील स्वच्छ पाणीपुरवठा आणि विविध पायाभूत सुविधा मिळाल्या आहेत. त्यांच्या समर्थकांचा विश्वास आहे की, यंदाही जनता त्यांना पाठिंबा देईल.

दिलीप खोडपे यांचा आव्हानात्मक लढा:

दिलीप खोडपे हे राष्ट्रवादी काँग्रेसचे नवे उभे राहिलेले नेतृत्व असून, त्यांनी जनतेत स्थानिक समस्यांवरुन सरकारला लक्ष्य केले आहे. ग्रामपातळीवरील प्रश्न आणि तालुक्यातील विकासाचा बॅलन्स साधण्यात सत्ताधारी पक्ष अपयशी ठरल्याचा आरोप करत त्यांनी या निवडणुकीत चांगलेच आव्हान उभे केले आहे. त्यांच्या प्रचाराला शरद पवार यांच्यासारख्या वरिष्ठ नेत्यांचे पाठबळ मिळाल्याने ही निवडणूक अधिकच चुरशीची झाली आहे.

मतदारांचा कौल ठरणार निर्णायक:

तालुक्यातील नागरिकांनी या दोन्ही नेत्यांच्या कामाचा लेखाजोखा घेतला आहे. "गेल्या पाच वर्षांत झालेल्या विकासकामांमुळे गिरीश महाजन यांना पाठिंबा द्यायचा की नव्या नेतृत्वाला संधी द्यायची?" असा प्रश्न मतदारांसमोर आहे.

23 नोव्हेंबरला निकालाचे रहस्य उलगडणार:

मतदान प्रक्रिया 20 नोव्हेंबर रोजी शांततेत पार पडली असून, 23 नोव्हेंबरला मतमोजणीनंतर कोण विजयी होणार हे स्पष्ट होईल. जामनेरवासीयांसाठी ही निवडणूक केवळ राजकीय नसून विकासाच्या नव्या पर्वाची सुरुवात ठरणार आहे.

तालुक्यातील जनता या थरारक निवडणुकीचा निकाल जाणून घेण्यासाठी उत्सुक आहे. "कौन बनेगा जामनेरचा नवा राजा?" याचे उत्तर 23 नोव्हेंबरला मिळणार आहे.

Previous article

This Is The Newest Post

Next article

Previous Post