जाणीवपूर्वक मराठीचा वापर करणे म्हणजे मराठी भाषेच्या संवर्धनासाठी योग्य पाऊल टाकणे होय प्रा.डॉ.लक्ष्मण शिंदे
सुरज म्हेत्रे / सांगली जिल्हा प्रतिनिधी
औद्योगिक व कामगार न्यायालय सांगली व लेबर लॉ प्रॅक्टिशनर्स असोसिएशन यांच्या संयुक्त विद्यमाने आयोजित मराठी भाषा संवर्धन पंधरवड्यानिम्मित आयोजित कार्यक्रमात प्रमुख पाहुणे म्हणून बोलताना डॉ.लक्ष्मण शिंदे म्हणाले,
जाणीवपूर्वक मराठी भाषेचा वापर केल्याने भाषेच्या विकासासाठी चिरकालीन मदत होते.याचे इतिहासातील उत्तम उदाहरण म्हणजे छत्रपती शिवराय होत.शिवरायांनी मराठी भाषा व पर्यायाने मराठी समाजाच्या वाढीसाठी राज्य भाषाव्यवहार कोश निर्माण केला.शिवपूर्व काळामध्ये मराठीत शेकडा ८६ शब्द हे फार्सीतील असायचे. शिवरायांच्या राज्याभिषेकावेळी हे प्रमाण शेकडा २८ वर आले.तर सन १७०२ मध्ये मराठीत फार्सीतून आलेले शेकडा केवळ ७ शब्द राहिले.
संयुक्त महाराष्ट्रासाठी १०५ मराठी जनांचा बळी गेला.. महाराष्ट्राच्या निर्मितीनंतर मराठी भाषेच्या विकासासाठी यशवंतराव चव्हाण यांनी मोठे योगदान दिले.अलीकडील काळात मात्र मराठीसाठी भरीव काम शासनस्तरावरुन होताना दिसत नाही.
जगभरामध्ये अनेक बोलीभाषा गेल्या काही वर्षांत मृत होत आहेत. मराठी भाषेच्या भविष्याची काळजी करण्याची गरज नाही.कारण ती भाषा लाखो खेडूत, अशिक्षित,अल्पशिक्षित यांनी उराशी बाळगली आहे. हाच मोठा आधार मराठीला आहे.
उच्चशिक्षित व उच्चवर्गीय समाजाने मराठी भाषेसाठी आपले योगदान द्यावे.
न्यायालायचे क्षेत्र हे जीवनाचे महत्त्वाचे अंग आहे.मराठीचे व्यावसायिक महत्व वाढण्यासाठी न्यायक्षेत्रासारखंच इतर क्षेत्रांनी पुढाकार घ्यावा.कायद्याची महत्वाची पुस्तके मराठीत अनुवादित झाली पाहिजेत. असे मतही त्यांनी व्यक्त केले.
मराठी भाषेला फार प्राचीन व संपन्न परंपरा आहे.संत,पंत, तंतांपासून आधुनिक साहित्यात ग्रामीण,दलित,स्त्रिया,आदिवासी यासारख्या साहित्य प्रवाहानी मराठी समाज व संस्कृतीचे प्रतिबिंब साहित्यात आले आहे..त्याचा लाभ घ्यावा. या सर्व साहित्य वाचनाचा आनंद घ्यावा. आपली भाषा आपण टिकवली पाहिजे.कारण ती आपली स्वाभिमान असते. भाषा संपली तर समाज संपतो असा इतिहास आहे.आपल्या भाषणात डॉ.शिंदे यांनी अनेक कवितांचा संदर्भ देऊन वातावरण मंत्रमुग्ध केले.
महाराष्ट्र सरकारने अत्यंत मौल्यवान असे पस्तीस पारिभाषिक कोश व सर्व विश्वकोश अलीकडे सर्वांसाठी महाजालावरही उपलब्ध करून दिलेले आहेत.त्यासाठी marathibhasha.org या वेबसाईटला सर्वांनी अवश्य भेट द्यावी. तिथे न्यायव्यवहार कोश हा न्यायालयीन कामकाजातील दहा हजार पेक्षा जास्त इंग्रजी शब्दांचे पर्यायी मराठी शब्द देणारा कोशही उपलब्ध आहे. त्याचा सर्वांनी आवर्जून उपयोग करावा.
त्यामुळे सर्वच पक्षकारांना आपल्या फिर्यादी बद्दल नेमकी काय चर्चा चालली आहे, याचा अंदाज येऊन न्यायव्यवस्थेवरील विश्वास वाढण्यास मदत होईल.सर्वानी युनिकोड या फॉन्टच्या आधारे मराठी टायपिंग करावे.
सांगली औद्योगिक न्यायालयाचे न्यायाधीश एन.एस. कोले साहेब अध्यक्षस्थानी होते. तर कामगार न्यायालय सांगलीचे न्यायाधीश श्री एच.डी. बाविस्कर यांची प्रमुख उपस्थिती होती.
यावेळी ज्येष्ठ विधिज्ञ ऍड.के.एच.कुलकर्णी,ऍड. के. डी. शिंदे उपस्थित होते.
अध्यक्षीय मनोगतात न्यायाधीश एस. एन. कोले यांनी उद्यापासून वकिलांनी आपले प्लिडिंग शक्य तिथं मराठीतून करावे. आम्ही अंतरिम आदेश मराठीतून करू आणि खटल्यांचा संपूर्ण निकालही मराठी मधून देण्याचा प्रयत्न करू. असा मनोदय व्यक्त केला. उपस्थित वकील, कर्मचारी,पक्षकार यांनी या निर्णयाचे मनःपूर्वक स्वागत केले.
Previous article
Next article
Leave Comments
टिप्पणी पोस्ट करा