गरिबीच्या मातीतून उगवला ‘शिक्षक’! पवन सोनवणे यांच्या जिद्दीला यशाची सलामी शास्त्रीनगरच्या पवन भाऊ सोनवणे यांची माध्यमिक विभाग, ठाणे येथे शिक्षकपदी निवड; संघर्ष, मेहनत आणि सातत्याच्या जोरावर साकारले स्वप्न

जळगाव जिल्हा प्रतिनिधी नितीन इंगळे 

जामनेर : परिस्थिती कितीही कठीण असो, मनात ध्येय आणि ते पूर्ण करण्याची जिद्द असेल तर यशाला गवसणी घालता येते, हे जामनेर शहरातील शास्त्रीनगर येथील रहिवासी पवन भाऊ सोनवणे यांनी आपल्या कर्तृत्वातून सिद्ध करून दाखवले आहे. गरिबीच्या परिस्थितीत शिक्षण घेत, अनेक अडचणींचा सामना करत आणि प्रचंड मेहनत घेत त्यांनी शिक्षक होण्याचे स्वप्न अखेर सत्यात उतरवले आहे.

पवन सोनवणे यांची माध्यमिक विभाग, ठाणे येथे इयत्ता ९ वी व १० वी साठी शिक्षकपदी निवड झाली आहे. त्यांच्या या निवडीची बातमी समोर येताच शास्त्रीनगर परिसरासह संपूर्ण जामनेर शहरात आनंदाचे वातावरण निर्माण झाले असून, नातेवाईक, मित्रपरिवार आणि हितचिंतकांकडून त्यांच्यावर शुभेच्छांचा वर्षाव होत आहे.

संघर्षाच्या वाटेवरून यशाच्या शिखराकडे...

पवन सोनवणे यांचा यशाचा प्रवास सहज-सोपा नव्हता. घरची आर्थिक परिस्थिती बेताची असतानाही त्यांनी शिक्षणाची वाट सोडली नाही. परिस्थितीने अनेकदा परीक्षा घेतली, अडचणी समोर आल्या; मात्र पवन यांनी प्रत्येक अडचणीला सामोरे जात आपले ध्येय कायम डोळ्यासमोर ठेवले.“परिस्थिती बदलण्याची वाट पाहण्यापेक्षा स्वतःच्या मेहनतीने परिस्थिती बदलायची,” या जिद्दीने त्यांनी शिक्षण पूर्ण करण्यासाठी अथक परिश्रम घेतले. दिवस-रात्र मेहनत, सातत्यपूर्ण अभ्यास आणि आपल्या ध्येयावर असलेला ठाम विश्वास यामुळे अखेर त्यांच्या प्रयत्नांना यश मिळाले.

 मेहनतीचे फळ अखेर मिळाले

आज पवन सोनवणे यांची शिक्षकपदी झालेली निवड ही केवळ नोकरी मिळाल्याचा आनंद नसून, गरिबी आणि प्रतिकूल परिस्थितीवर केलेल्या विजयाची कहाणी आहे. संघर्षातून शिक्षण घेतलेल्या पवन यांच्या यशामुळे त्यांच्या कुटुंबीयांसाठी हा अत्यंत अभिमानाचा आणि भावनिक क्षण ठरला आहे.विशेष म्हणजे पवन सोनवणे हे दीपक खंडारे यांचे भाचे आहेत. पवन यांच्या या उल्लेखनीय यशामुळे खंडारे कुटुंबीय, नातेवाईक, मित्रपरिवार तसेच शास्त्रीनगर परिसरातील नागरिकांकडून त्यांचे अभिनंदन करण्यात येत आहे.

आता विद्यार्थ्यांना घडविण्याची जबाबदारी

माध्यमिक विभाग, ठाणे येथे इयत्ता ९ वी व १० वीच्या विद्यार्थ्यांना शिक्षण देण्याची संधी पवन यांना मिळणार आहे. ज्या संघर्षातून ते स्वतः घडले, त्याच अनुभवातून विद्यार्थ्यांना प्रेरणा देत त्यांच्या उज्ज्वल भविष्यासाठी काम करण्याची संधी त्यांना मिळाली आहे.

पवन सोनवणे यांच्या यशाची कहाणी ही जामनेरमधील अनेक युवकांसाठी प्रेरणादायी ठरणारी आहे. गरिबी असली म्हणून स्वप्नं छोटी असण्याची गरज नाही; जिद्द, मेहनत आणि सातत्य असेल तर परिस्थितीवर मात करून यश मिळवता येते, याचा आदर्श त्यांनी आपल्या प्रवासातून घालून दिला आहे.जामनेरच्या शास्त्रीनगरचा मान वाढविणाऱ्या पवन भाऊ सोनवणे यांचे शिक्षकपदी निवड झाल्याबद्दल मनःपूर्वक अभिनंदन.आपल्या हातून हजारो विद्यार्थ्यांचे भविष्य घडो आणि आपल्या संघर्षाची कहाणी अनेकांना प्रेरणा देत राहो, हीच मनःपूर्वक सदिच्छा

Previous article

Next Post

Next article

Previous Post