जामनेर तहसीलमध्ये 25 हजारांची लाच; महसूल सहाय्यकासह वकील एसीबीच्या जाळ्यातनिकाल बाजूने लावण्यासाठी लाचेची मागणी; पंचांसमक्ष रक्कम स्वीकारल्यानंतर दोघे ताब्यात

जळगाव जिल्हा प्रतिनिधी नितीन इंगळे 

जामनेर : जामनेर तहसील कार्यालयात वहिवाट दाव्याचा निकाल तक्रारदाराच्या बाजूने लावण्यासाठी 25 हजार रुपयांची लाच स्वीकारल्याच्या आरोपावरून महसूल सहाय्यकासह एका वकिलाला लाचलुचपत प्रतिबंधक विभागाने (एसीबी) सापळा कारवाईत ताब्यात घेतले. ही कारवाई 21 सप्टेंबर रोजी जामनेर तहसील कार्यालयात करण्यात आली.

एसीबीने दिलेल्या माहितीनुसार, जामनेर शिवारातील गट क्रमांक 407 मधील शेतात ये-जा करण्यासाठी नवीन रस्ता मिळावा, यासाठी तक्रारदाराने सन 2022 मध्ये तहसील कार्यालयात वहिवाट दावा दाखल केला होता. सदर दावा अंतिम निकालासाठी प्रलंबित होता.

या दाव्याचा निकाल तक्रारदाराच्या बाजूने लावण्यासाठी तहसील कार्यालयातील महसूल सहाय्यक प्रविण सुपडु गांगुर्डे यांनी सुरुवातीला 30 हजार रुपयांची लाच मागितल्याचा, तर तडजोडीनंतर 25 हजार रुपये देण्याचे ठरल्याचा आरोप आहे. याबाबत तक्रारदाराने एसीबीकडे तक्रार केली.

तक्रारीची पडताळणी केल्यानंतर एसीबीच्या पथकाने जामनेर तहसील कार्यालयात सापळा रचला. एसीबीच्या माहितीनुसार, वकील योगेश रामलाल वखरे यांनी पंचांसमक्ष 25 हजार रुपयांची लाच स्वीकारली. त्यानंतर ही रक्कम महसूल सहाय्यक प्रविण गांगुर्डे यांच्याकडे देण्यात आली. गांगुर्डे यांनीही रक्कम स्वीकारून ती आपल्या पँटच्या उजव्या खिशात ठेवल्याचे एसीबीने नमूद केले आहे.

यानंतर एसीबीच्या पथकाने कारवाई करत लाचेची रक्कम जप्त करून दोन्ही संशयितांना ताब्यात घेतले. या प्रकरणी जामनेर पोलीस ठाण्यात भ्रष्टाचार प्रतिबंधक कायद्याच्या कलम 7, 7-अ आणि 12 अन्वये गुन्हा दाखल करण्याची प्रक्रिया सुरू असल्याची माहिती एसीबीने दिली.

ही कारवाई लाचलुचपत प्रतिबंधक विभागाच्या पथकाने केली.

दरम्यान, या प्रकरणातील आरोप हे एसीबीच्या सापळा कारवाईच्या माहितीनुसार आहेत. संबंधित प्रकरणाचा अंतिम निर्णय न्यायालयीन प्रक्रियेनंतरच स्पष्ट होणार आहे.

लाच मागितल्यास एसीबीशी संपर्काचे आवाहन

कोणत्याही लोकसेवकाने शासकीय काम करून देण्यासाठी लाचेची मागणी केल्यास नागरिकांनी लाचलुचपत प्रतिबंधक विभागाशी संपर्क साधावा, असे आवाहन एसीबीकडून करण्यात आले आहे.

Previous article

Next Post

Next article

Previous Post