जामठीत रेशन तांदळाच्या काळाबाजाराचे मोठे रॅकेट? गरीबांच्या हक्काच्या धान्यावर व्यापाऱ्यांचा डल्ला; ४०७ वाहनातून कथित वाहतूक!कोणाच्या आशीर्वादाने सुरू आहे हा गोरखधंदा? कवडीमोल भावात रेशन तांदळाची खरेदी, काळ्या बाजारात चढ्या दराने विक्री; बातमी प्रसिद्ध होताच संबंधित व्यापाऱ्याचे धाबे दणाणले?
जळगाव जिल्हा प्रतिनिधी नितीन इंगळे
जामठी : शासनाकडून गोरगरीब आणि गरजू कुटुंबांसाठी वितरित करण्यात येणाऱ्या रेशनच्या तांदळाच्या कथित काळाबाजाराचा गंभीर प्रकार जामठी परिसरात चर्चेचा विषय ठरत आहे. गरीब लाभार्थ्यांकडून रेशनचा तांदूळ कवडीमोल भावात खरेदी करून त्याची काळ्या बाजारात चढ्या दराने विक्री केली जात असल्याचा आरोप होत आहे. विशेष म्हणजे, हा कथित गोरखधंदा गेल्या काही वर्षांपासून सुरू असल्याची चर्चा असून, या संपूर्ण व्यवहारामागे नेमके कोण आहे, हा प्रश्न आता उपस्थित होत आहे.
४०७ वाहनातून तांदळाची वाहतूक; माल जातो तरी कुठे?
मिळालेल्या माहितीनुसार, गरीब लाभार्थ्यांकडून कमी दरात रेशनचा तांदूळ खरेदी केला जात असल्याची चर्चा आहे. त्यानंतर हा तांदूळ ४०७ वाहनामध्ये भरून पुढील ठिकाणी वाहतूक केला जातो आणि अधिक दराने विक्री केला जात असल्याचा आरोप आहे. हा तांदूळ नेमका कुठे जातो? कोणत्या व्यापाऱ्यांकडे त्याची विक्री होते? या व्यवहाराची संपूर्ण साखळी कोण चालवत आहे? या प्रश्नांची उत्तरे मिळणे आवश्यक आहे.
‘खबर आपकी आवाज’च्या बातमीने खळबळ; व्यापाऱ्याने खरेदी थांबवल्याची सूत्रांची माहिती
रेशन तांदळाच्या कथित काळाबाजारासंदर्भात ‘खबर आपकी आवाज’ने काल बातमी प्रसिद्ध केली होती. या बातमीनंतर संबंधित व्यापाऱ्याने सध्या रेशनचा तांदूळ खरेदी करणे थांबविल्याची माहिती सूत्रांकडून प्राप्त झाली आहे. या माहितीची अधिकृत पुष्टी झालेली नसली, तरी या घडामोडीमुळे परिसरात चर्चेला उधाण आले आहे.
कोणाच्या आशीर्वादाने सुरू आहे हा गोरखधंदा?
जामठी परिसरात रेशनच्या तांदळाची कथित खरेदी-विक्री अनेक वर्षांपासून सुरू असल्याची चर्चा असेल, तर या व्यवहाराकडे आजपर्यंत संबंधित यंत्रणेचे लक्ष का गेले नाही? या व्यापाऱ्यांना कोणाचे पाठबळ आहे का? कोणाच्या आशीर्वादाने गरीबांच्या हक्काच्या धान्याचा हा कथित व्यवहार सुरू आहे? संबंधित यंत्रणेला याची माहिती नाही की जाणूनबुजून दुर्लक्ष केले जात आहे?
हे प्रश्न आता जनतेकडून उपस्थित केले जात आहेत. प्रशासनाने या प्रश्नांची उत्तरे देणे गरजेचे आहे.
पुरवठा विभागाने आता तरी जागे व्हावे!
संबंधित पुरवठा विभागाने जामठी परिसरातील रेशन धान्याच्या खरेदी-विक्रीची सखोल चौकशी करावी. ४०७ वाहनातून होणाऱ्या संशयित वाहतुकीची तपासणी करावी. तांदळाचा साठा कुठे केला जातो, तो कोण खरेदी करतो आणि पुढे कुठे विकला जातो, याचा शोध घ्यावा. दोषी आढळणाऱ्यांवर कठोर कायदेशीर कारवाई करावी, अशी मागणी होत आहे.
खबर आपकी आवाज’ टीम करणार या कथित गोरखधंद्याचा पर्दाफाश
जामठी परिसरातील या प्रकरणाचा पाठपुरावा ‘खबर आपकी आवाज’ टीमकडून सुरू आहे. संबंधित व्यापारी कोण? ४०७ वाहनातून तांदळाची वाहतूक कुठे होते? या व्यवहारामागे आणखी कोणाचा सहभाग आहे? या सर्व बाबींची माहिती आणि पुरावे गोळा करण्याचे काम सुरू आहे.
लवकरच या कथित व्यवहाराबाबत अधिक माहिती आणि उपलब्ध पुराव्यांसह सविस्तर वृत्त प्रसिद्ध करण्यात येणार आहे.
गरिबांच्या हक्काचा तांदूळ कोणाच्या खिशात जात आहे? या कथित गोरखधंद्याला कोणाचे अभय आहे? आणि प्रशासन कारवाई करणार तरी कधी?
या प्रश्नांची उत्तरे आता जामठीकरांना हवी आहेत
Previous article
This Is The Newest Post
Next article

Leave Comments
टिप्पणी पोस्ट करा